Даркылаахха эстафета былааҕа ыалдьыттыыр!

Олунньу 21 күнүгэр 1-кы Баатара нэһилиэгин олохтоохторо сыыдам сырыылаах массыына миҥэлэригэр мэҥэстэн, улууспут саамай ыраах сытар Даркылаах нэһилиэгэр айан суолун туттулар. Олунньу оргуйар тумана уостан, ылааҥы күн туран биэрэн суол уһунун, айан ырааҕын биллэрбэтэ.

Күн бастакы аҥаарыгар икки нэһилиэк спортка табаарыстыы көрсүһүүтүгэр 26,5:8,5 очконан ыалдьыттар сабырыйан, Бэдьимэлэр кыайыыны суруннулар. Икки көрсүһүү кэннэ уопсайа 53 очукуоланан Бэдьимэлэр спортка өтөрүнэн буолбатах көрдөрүүнү ситистилэр.

Күн иккис аҥаарыттан оһуохайы көрдүбүт. Улууспут бу эрэ нэһилиэгэ бэйэтэ туспа түөлбэ оһуохайдааҕынан олохтоохтор киэн тутталлар. Оҕолорго Галя Федорова, ыччаттарга Вячеслав Перевалов уонна Александра Макарова киэн түһүлгэни төрүттээтилэр. Түмүккэ, Александра Макарова Чыамайыкылыы оһуохайы таһаарар кэмигэр олохтоохтор бары даҕаны өрө көтөҕүллэн, хааннара оонньоон үөрэ — дьүөрэ түстүлэр. Бу кэмҥэ үгүс киһи санаата биир ситимҥэ киирэн куйаарга көтөҕүлүннэ. Бастыҥнарынан бэлиэтэнэн, Вячеслав Перевалов дипломант, Александра Макарова лауреат үрдүк ааттарын ыллылар. Чыамайыкылар оһуохайдара 4, 05 баалга сыаналанна.

Бэдьимэлэр уус-уран кэнсиэрдэрэ тыыннаах доҕуһуоллаах самодеятельнай хортан саҕаланна. Хор олус үрдүк профессиональнай таһымҥа бэлэмнэммитэ, иэйэн — куойан толоруулара кэнсиэр уопсай хаамыытыгар тэтим биэрдэ. Бэдьимэлэр кэнсиэрдэрэ, бэйэлэрин майгыларыгар ханыылыы сэмэйдик, ол эрэн, бэйэ ис күүһүгэр бигэтик эрэнэн, тирэхтээхтик тирэнэн хаамыылаах ат ахсым сэлиитинэн сэгэлдьитэ турда.

Кэнсиэргэ саха култууратыгар «эталон» буолбут айымньылар, чуолаан архетип буолбут «һээдьэ» үҥкүүгэ тиийэ тиһиллэн, аныгылыы көрүүнү кытары ситимнэһэн киирдилэр. Кэнсиэр толкуйа, тутула уонна сценарийа бэйэтэ туспа уус-уран айымньы буолла.

Түмүккэ, дипломаннар ааттара «Аргыстар» сценка, «Саха култуурата сайдарын туһугар» чабырҕах, трио толоруутугар «Маҥнайгы хаар», «Аныгы балыксыт» сценка буоллулар. Дьэ, бу киэһэ лауреат грамоталарынан наҕараадаланнылар: самодеятельнай хор толоруутугар «Баатара өрөгөйүн ырыата», «Эдэркээн, мэникчээн туллукчаан» ырыалар, кырыымпаҕа төрүт дорҕоон, Елена Дмитриева толоруутугар хомуска дьүһүйүү, «Дэйбиирдээх үҥкүү», «Ретромода» дефиле, «Сырдык сүүрээн» вокальнай ансаамбыл, «һээдьэ» үҥкүү, Айаал Аргунов солота, Фольклорнай коллаборация, Петр Андросов солота, уус-уран ааҕыы бөлөҕө, Егор Захаров уонна Валерий Ноев дуэттара, «Хоровод дружбы» үҥкүү буоллулар.
Бэдьимэлэр кэнсиэрдэрэ 4,20 баалга сыаналанна.

Бу кэнсиэри көрөн олорон бигэтик өйдүүгүн, сир — дойду баайа дуола онно олохсуйан олорор дьон-сэргэ буолалларын. В.В. Ноев аатын сүгэр Бэдьимэтээҕи култуура киинигэр култуура кэккэтигэр ааспыт тыһыынча сылларга сүрэхтэммит, улахан опыттаах үлэһиттэр үлэлииллэр. Валерий Валерьевич Ноев бэлэмнээбит хас биирдии ырыатыгар өссө ханна да истэ илик ураты куоласка араарыы, хас биирдии айымньы куплеттарын аайы хатыламмат тэтим сайдыыта, айымньыны түмүктүүр кэрчиктэрэ көрөөччүлэр дууһаларын долгуттулар. Бу хормейстер талаанын кылаан чыпчаала, сатабылын кэрэһитэ буолар. Тыыннаах доҕуһуолунан сценаҕа ырыаны толоруу, бу ыллатар ансаамбылгар, чуолаан хорга олус улахан эппиэтинэс. Манна дирижер Елена Ноева үлэтэ эмиэ улахан суолталаах.

Үҥкүүлэри олоҕун кэрэ эйгэтигэр анаабыт Милентий Петрович Неустроев уонна эдэр Майя Неустроева салайан туруорбуттар. Милентий Петрович бэлэмнээбит «Дэйбиирдээх үҥкүүтүгэр» 3 көлүөнэ көстүүтэ кэрэхсэллээхтик көһүннэ. Биир кэмҥэ сценаҕа 36 киһи үҥкүүлүүрэ олус да кэрэ!

Бу кэнсиэр истиҥ-иһирэх тыына, сомоҕолуур киинэ буолан нэһилиэк аҕа баһылыга Петр Андросов дьонун кытары тэҥҥэ кыттыбыта буолла. Сир-ахсын баһылыктарбыт дьоннорун-сэргэлэрин бэйэлэрин үтүө холобурдарынан кэрэҕэ-сырдыкка сирдииллэр!

Галия Сосина, Мэҥэ Хаҥалас улууһун култуураҕа уонна духуобунай сайдыыга салалтатын Информационнай методическай киинин салайааччыта, дьүүллүүр сүбэ бэрэссэдээтэлэ